Liewe Gebedsmaat,

Dankie dat jy hierdie weeklikse briefie lees en soms antwoord! Jou ondersteuning en gebede beteken báie! Jy is soos Aäron en Hur wat moeë hande omhoog hou veral as die stryd soms kwaai word!

Teks:Deut 33:27 "DIE EWIGE GOD IS 'N SKUILPLEK, SY ARMS IS ALTYD ONDER JOU!"

Ek bid dat jy dit as 'n werklikheid sal ervaar! In tye van siekte en eensaamheid vra ek die Here om jou en joune te dra!
DANKBAARHEID: Die Here sorg so mooi vir ons. Dankie dat jy deel daarvan is! Van Donderdag tot Maandag was ons 2 vir die eerste maal vanjaar weer in Pretoria. Dit was soos 'n wegbreek en ons kon bietjie rus  waarvoor ons dankbaar is!
TAKE:
Ons kon boeke gaan uitsoek by die OM gebou vir ons Gala-aand.....prysuitdeling! Dis regtig jammer dat die plek gaan sluit!
By Lettie "gowns"(soos almal haar noem) kon ons togas en pette gaan huur. Iemand het belowe om vir ons te maak! Sal daardie persoon asseblief weer kontak maak?

BRODE: Ons het gereeld weekliks 100 brode by Sunbake ontvang, waarna dit gestop het. Het iemand dalk 'n oop deur na hulle toe? Asseblief skakel ons as jy kan help!

BBM VIDEO: Bid asseblief dat ons ssm 'n 7minute video kan vervaardig, omdat verskeie instansies daarvoor vra. Dr Peter Hammond se span het 'n 20 min video gemaak wat ons so kan gebruik, maar 'n nuwe kort video moet nou dringend gemaak word. Dankie dat jy saambid!

ROOIRIBBOK HUIS: Dit was 'n voorreg om na soveel maande...byna 'n volle jaar...weer in ons familie-huis in die voorste woonstel te bly. Hierdie groot ou huis met sy baie herinneringe...waar ons vier lewendige seuns skool en universiteit toe is...getroud is...en twee van hulle en hulle bruide het selfs daar gewoon vir 'n tyd! Ons Nigeriese Christenvriende wat huur kyk redelik goed na alles!

GYMNASIUM REUNIE: Shai het heerlik gekuier met vriende van weleer: 1961 en ek het twee voorbidder vriendinne bygekry! Vreugde!

GEBEDSVENNOTE: 14 Van ons kon hande vat...met maskers op...en Hanna Terblanche het weer heerlike romerige sampioensop en vetkoekvingers gebring. Dankie aan elkeen wat iets gebring het om te kou. Ons het heerlik uit ons harte saamgebid! Ai, 'n biduur is darem die lekkerste ding op aarde!! As kinders het ons my dierbare moeder geterg en gesê: " Wanneer Mamma in die hemel kom sal u eerste woorde sekerlik wees: Kom ons hou 'n biduur!!!"

GENERAALS ONTBYT: Soveel leë plekke...van hulle wat reeds weg is...ons moet elke dag gereed wees...ons is mos nou in die tagtigerjare! Wat 'n seën om nog volstoom vir ons Koning te kan werk!!

KOSMOSKUIER: Saterdagaand het ons ingeklok by 'n pragtige gastehuis wat uitkyk op palmbome langs die Hartebeespoortdam...'n heerlike aandete saam met Dr Keith Michaels en Cynthia Reevas. Ons twee het begin hoes en snuif en sommer gou het sy medikasie by die praktyk gaan haal. So sorg ons Vader so mooi vir ons!
Sondagmore in die tuinkerk kon ons die Woord bring oor die Verlore seun, die wagtende, hardlopende vader en die ouer broer wat geweier het om te vergewe! 'n Vriendin het 'n paar sakke swaar gelaaide kruideniers en kosvoorraad vir BBM gebring! Dankie dankie! Ons waardeer dit!!

TANDARTS: Elreza was mos noual by drie verskillende tandartse wat nie kans gesien het om die kiestand wat ontsteek is te trek nie. Kol Martin Blignaut het met groot moeite gereël dat sy 5vm Maandagmore 'n sekere Dr Havenga kon sien by die Waterkloof lugmagbasis.  Dit blyk toe dat die dr 'n Waterkloof Hoërskool leerling was wat in haar koor gesing het, jare gelede! Die tand is toe uiteindelik getrek met pynlike nagevolge....seer kakebeen, ore, wangspiere....wat maar tyd neem om te genees!

BOOMPLANTDAG: Van orals het vriende en sending ondersteuners geskakel sodat ons bome kon gaan oplaai en ook koop o.a by Jasmyn Windmeul...daardie interessante boeremark! Veilig tuis...by ons geliefde BBM familie wat ons met liefde terug verwelkom het.

CLIVE ROBERTS: Hy is ons Back to the Bible Board of Directors Coach wat ons vir 'n ontbyt genooi het wat ons op so 'n mooi manier geïnspireer en bedank het vir wat ons doen by BBM. Dit het ons harte geraak.

JAARGROEP SOKKERFINAAL: Almal, man en muis was gister op of langs die veld vir vanjaar se finale wedstryd. En raai wie wen toe? Die tweede jaars met rooi geleende hemde!  Ons wonder of iemand nie weer hemde vir 2 spanne wil skenk of maak nie? Jare gelede het Marie Fourie van Bloedrivier twee spanne geklee met rooi en blou hemde en broeke!! So sorg die Here deur Sy mense vir ons!

Mag jy 'n geseende week belewe!  Onthou ons CAROLS BY CANDLELIGHT  op Vrydag 19 Nov 6nm!
Shai en Elreza Mulder en ons BBM familie hier in die Vallei van genade!
Webwerf: www.bbmission.co.za
+27 833066323
 

NetObjects Fusion 2015